Il mese della Madonna, regina di un mondo scomparso

Nel mondo dei campi del me tempo, la zente sto mese lo ciamava solo “El mese de la Madona”. Na fede sensa ombre e tanti capitei spampanà par le campagne in onore de la Mama de Gesù. Alora, in quel picolo mondo dei paesi, girava come scola de vita proverbi e modi de dire, uno de questi recitava: «Se Dio no vole, nessun Santo pole». «Solo che la Madona – continuava don Giovani – la xe so mama, de Gesù, e come a le nosse de Cana, la ga un potere più grande de ogni altro santo».

Nel mondo dei campi del me tempo, la zente sto mese lo ciamava solo “El mese de la Madona”
Na fede sensa ombre e tanti capitei spampanà par le campagne in onore de la Mama de Gesù. El rosario (el Fioreto) torno ai capitei, no gaveva le litanie tanto longhe come quele de sti tempi de Radio Maria, dove i titoli che ghe vien dà a la Madona no finisse più.
Mi so fermo a quelo che me ga insegnà un santo prete del me tempo, come lo ciamava la zente. El consigliava i devoti de ripetere solo l’Ave Maria che dentro a na sola parola ghe xe tuto, quel che se pol dire de sta Mama celeste.
Alora se pregava in latin e anche el rosario se recitava in latin. Don Giovani diseva che quando gavemo dito Santa Maria “Mater Dei” gavemo dito l’unico titolo che vale tuti i altri possibili, che resta solo umani.

Alora, in quel picolo mondo dei paesi, girava come scola de vita proverbi e modi de dire, uno de questi recitava: «Se Dio no vole, nessun Santo pole»
«Solo che la Madona – continuava don Giovani – la xe so mama, de Gesù, e come a le nosse de Cana, la ga un potere più grande de ogni altro santo». Adesso coi trenta rosari al giorno de Radio Maria, co tuti i titoli che i ghe zonta, penso a quel don Giovani che gera devoto de la Madona e ne diseva che: «Basta dirghelo, co fede, na volta sola le nostre necessità, e se la pole la ne aiuta, sensa ripetarghelo mile volte, come se la fosse sorda».

Preti de na volta, adati al so tempo che no gaveva né radio né television
Nei capitei come su l’altare, se impissava le candele. No ghe gera la corente eletrica. Davanti ai capitei che se trovava drio le strade, o anche solo un quadro incornizà e tacà a na pianta che dava su la strada, no ghe gera omo che no se tocasse el capelo passandoghe davanti, in segno de rispeto.

Qualcun la ciamava anche la Parona benedeta come padre Leopoldo
Quando prima de l’ultima guera qualche assicuratore girava par le campagne a parlarghe ai contadini de assicurarse contro la tempesta, quasi tuti, dopo averlo scoltà, i ghe rispondeva che lori gaveva za na assicurassion contro la tempesta: un quadro de la Madona a capo leto.
Eco parcossa che ne l’Ave Maria picenina nel nostro dialeto, a un serto punto se dise: «E protegi le campagne col to manto da regina».

Quela de la nostra cesa, nel so altare, la gaveva un grande manto azuro, trapuntà de stele
E ne le scole elementari, le maestre insegnava sempre na poesia che riguardava el mese de magio, parvìa de la primavera in esplosion de fiori e profumi che impeniva l’aria. Una del me tempo scominsiava cussì: «Maggio risveglia i nidi, maggio risveglia i cuori / porta le ortiche e i fiori / le serpi e l’usignol». E questo gera anche un insegnamento par ricordarse che, ne la vita e ne la Natura, ghe xe i fiori e le spine, el bel tempo e anche el temporale.

Un mondo picenin, scomparso, sparìo come na nuvola in cielo
Adesso vivemo in un mondo che nessun podeva immaginare. Ma quei, come mi, che lo ga visto e soratuto vissuo, se lo porta ancora dentro, fresco e brilante come na giornata de magio.

Copyright Difesa del popolo (Tutti i diritti riservati)