Il viaggio a Roma di zio Piero

Par tante persone, anche de meza età, sto mondo che xe sta mio e serco de descrivare, i lo crede inventà come na favola de na volta, parchè ghe pare impossibile che i omani gabia vivesto e caminà in un tempo come quelo: epure la xe Storia, nuda e cruda – come dire autentica –  anche se qualche volta mi ghe zonto qualche coriandolo par darghe un fià de colore.

Ma ripensando ai paragoni fra quel vivare distante e sto nostro presente videocomandà, no ocore tante spiegassion, basta vardarse torno e i video dei televisori, in ogni fameja. Anche considerando le novità del progresso in sti primi quindese ani del domile.
Al me tempo la scola scominsiava par tuti, dal primo de otobre: “Tutte le scuole di ogni ordine e grado”. L’ordine vegneva da Roma dove comandava un Capo che bisognava ubidire, (quei come mi se lo ricorda ancora).
El mondo contadin, l’unica industria a portata de man, viveva de la tera, fra el lavoro e la miseria, quasi sempre aiutà da le bestie. Un scritore ga sentensià fra le altre robe che più che vivare, alora, i omani ‘sopraviveva’, rispeto ai nostri dì teleguidati. A sto proposito el mondo de la ricerca ga rilevà che, anche sensa saverlo, i omani de sto tempo se pol dire che i xe in bona parte teleguidati. Diesìne de delegiornali de ogni colore, informassion sul trafico, sul tempo: prevision sientifiche che a volte se sbusiara.
Nel filò del me tempo prima e durante l’ulima Guera – ghe gera un  un vecio del logo che i ciamava  zio Piero (morto da tempo a 93 ani). El contava sempre del so viagio a Roma a piè, guidà da un prete che gera sta el so capelan militare dei alpini al fronte, co la disfata de Caporeto.
Ne la primavera del 1919 , fra un grupeto de reduci del logo, el gaveva organizà sto viagio a piè fin a Roma, par vedare el Papa e ringrassiare el Padreterno de essare tornà vivi da la guera.
“El Papa – el contava tuto emossionà – i lo portava a spale su la sedia gestatoria e un pageto co un atresso de piume colorate in fondo a un manego come de na scòa, sventolava el Papa. El nostro Capelan ne ga spiegà che quela ventola gera na usansa  antica e se ciamava ‘Flabello’ un nome difissile che me ricordo ancora”.
Ma Quelo che ghe gera restà ne la mente, al de fora de tute le aventure de quel viagio, xe sta che quando el Papa li ga ricevù, co dei altri reduci, par la benedission: ga tocà inzenociarse par tera e caminare coi zenoci fin che el Papa ghe passava da rente benedisendo co l’acqua santa”.
Come paragon, a go pensà che sel fosse ancora al mondo el vedesse Papa  Francesco, el restarìa confuso, come alora; lo stesso de quei che pensa al tempo de la miseria: impossibile. Ma ghe gera sempre la conclusion del Zio Piero che la disèva ridendo, parchè el la gaveva sentìa e imparà e la ghe pareva na roba da mati. “I omani continua a nassare, da mejari de secoli, ma ghe ne gavìo mai visto uno co le ale? Vol dire che el ‘Paron’ xe sempre Quelo”. Na verità indiscutibile. Alora, in qualche filò ghe gera dei analfabeti geniali.

Copyright Difesa del popolo (Tutti i diritti riservati)