Questo nel mondo dei paesi e dei campi el gera el mese de la Candelora el secondo dì de febraro. Na devossion particolare a la Madona co l’offerta de un cero (na candela), parchè la protegesse le campagne da la tempesta e da la sicità: che al tempo gera cause de tribolassion e anche de fame in serti casi. Belo – se fa par dire – sto fidarse dei cristiani de l’Unico che podeva difendarli e aiutarli.
Come sempre nel me discorare del passato e de le storie de quel tempo che, in sostansa no le xe altro, magari in maniera picenina, che la “storia” de un picolo mondo che xe sta rapresentativo de un popolo che ormai ga solo pochi superstiti ancora in vita. El me ricordare i fati e le usanse de quel tempo, me serve anche par metare sempre in evidensa la “fede” de quei nostri predecessori, in gran parte analfabeti, ma cristiani «de bona marca», come disèva dal pulpito don Vito, un prete che gaveva fato la guera mondiale e, ne la ritirata disastrosa de Caporeto – el lo ricordava spesso – el gavèva dà l’oio santo ai moribondi, o anche ai morti, par giornate intiere. Un disastro da no poder inmaginare. Un prete particolare, che gera in paese in pension ne la so casa e in aiuto volontario a la parochia, nel bisogno. Nol gera nè un capelan e gnanche un coadiutore. El precisava spesso sta so posission par fare in modo che – al bisogno – i fedeli se rivolgesse a chi de competensa. Come confessore el gaveva un confessionale in legno co l’inginochiatoio a balconsin velato verso l’interno. Come dire che el gera un confessionale par done, come tuti in quel tempo ne le cese, solitamente nei angoli de le navate. Chi sa se ghe xe ancora quei che se li ricorda sti confessionali che i ghe ciamava anche el purgatorio de le done, parchè i gera scomodi. Da tempo ormai i xe quasi sparii ne la magioransa de le cese, salvo la custodia de quei che gera degni de essare considerà opere d’arte. Ma a parte el fato de sto don Vito, ormai in paradiso da tre quarti de secolo, questo nel mondo dei paesi e dei campi el gera el mese de la Candelora el secondo dì de febraro. Na devossion particolare a la Madona co l’offerta de un cero (na candela), parchè la protegesse le campagne da la tempesta e da la sicità: che al tempo gera cause de tribolassion e anche de fame in serti casi. Belo – se fa par dire – sto fidarse dei cristiani de l’Unico che podeva difendarli e aiutarli. El proverbio a sto proposito sentensiava: «Da la Candelora de l’inverno semo fora». Anche se tante volte no gera vero dal tuto; in qualche caso la neve durava fin quasi in aprile. Un mondo picenin povaro ma maravejoso, dentro al quale l’omo viveva el so essere creatuta a contato direto col so Creatore. Tornando a quel don Vito in pension, quando el predicava dal pulpito, raramente par qualche circostansa particolare, el smissiava l’italian al dialeto, co tuto rispeto, parchè l’importante gera «capirse», el diseva come par scusarse. Parchè in guera tanti omani parlava solo nel so dialeto, no i conosseva l’italian par no essare andà a scola. Questo el gera el mondo de la realtà che lu conosseva come pochi che gera sta preti e anche militari. Lu se spostava solo caminando, anche de note se qualche malà lo ciamava, el caminava svelto par chilometri insieme col so angelo custode – el ghe diseva – a quei che gaveva paura che l’incontrasse dei malviventi. Come prete, sicome el faseva del ben anche materiale, podendolo fare: racolieva da na parte e lo portava da naltra, in silensio.
