Questo xe el mese de la racolta del formento, la fonte de vita più importate, par i omani del secolo passà, e anche par quei de sto secolo ancora novo e confuso. «Formento e formenton dà la vita al so paron». Un proverbio adato al mese: come dire el pan e la polenta.
Quei che girava par le strade dei paesi, vedeva i cavajoni de faje che se alsàva su la corte de le case che spetava la trebia par separare le spighe dai grani benedeti. La ruza de la trabiatrice – de quel tempo – se spàmpanava par le campagne come na benedission in più. Ma lo strepito più forte lo faseva el tratore che tirava el sengion (la cinghia) che meteva in moto la trebia. Da la parte dei grani, ghe gera i omani che rancurava el formento nei sachi; da l’altra parte de la trebia, solitamente, essendo un lavoro più leziero, le done che rancurava la paja e la portava, coi angoni (pertiche), verso el posto stabilìo dove se tirava su el pajaro (cumulo di paglia) a volte più alto della casa, par farghe leto ne la stala ale bestie.
Nel ricordo de quel tempo che quei come mi, se i xe ancora in vita, ga visto e vissuo diretamente, ricordarà de sicuro, che la fede faseva sempre parte dei pensieri de quei omani. Da lo stesso formento che vegneva el pan naturale par la vita: vegneva anche el pan par le anime: l’eucarestia, el nutrimento per l’anima dei fedeli. Qualcuno podarà pensare che ripeto spesso come viveva la fede quela zente. Ma se trata de un fato storico che uno no pol desmentegare parchè el gera parte viva de quel mondo. La semplicità de quela fede serena, sensa storie, me porta sempre al confronto co quela del nostro tempo scolarizà, piena de se e de ma che la vole spiegare, ragionando da omani, che resta ancora povare creature sensa possibilità de “capire” quel Divino, che la zente dei campi sentiva dentro, e lo vedeva coi oci, ne la Natura, sensa bisogno de discorsi.
E questo gera anche el mese dedicà a la devossion del Sacro cuor di Gesù. Se pol dire che quasi no ghe gera casa cristiana sensa na inmagine del Sacro Cuore che lo gaveva scoverto, al centro del peto, che gera come dire: «Eco quel cuore che ga tanto amà sti omani da regalarghe la so vita par amore». Ghe gera anche na coroncina da recitare al Sacro Cuore, che le nostre mame, ormai in paradiso da tanti ani, recitava co devossion; e a noialtri le ne insegnava na giaculatoria che xe ancora in giro: «Sacro Cuor di Gesù, confido in voi». E no mancava nei filò de quel tempo, quelo che sentensiava la so convinsion de credente, fasèndo rilevare el fato che solo un Dio podeva pensare a na “invension” come l’eucarestia: «Metarse dentro al pan par restare co noialtri omani fin a la fine dei secoli. Quando no ghe sarà più pan, no vivarà più omani e sarà la fine». Quela ruza monotona che vegneva da le trebie e se spampanava fra i pampani de le vigne, se portava drio anche na polvare fina, che durava fin a la sera; parchè par la matina dopo, el fresco de la note, gaveva fato tornàre l’aria limpida e trasparente come sempre. L’inquinamento doveva ancora rivare.
