In paese ghe gera un omo che se ciamava Arturo, un massarioto, pàre de fameja e un bon omo che godeva la fama de indovino parvìa del tempo. Un bravo agricoltore che, a richiesta, pronosticava l’avenire del tempo (in picolo), question de giorni o na setimana, e el più de le volte el ghe indovinava anche se pareva impossibile.
Quando se andava a scola, al tempo che nei paesi ghe gera el podestà al posto del sindaco – ani Trenta del secolo passà – fin da le elementari i ne parlava dei omani che gaveva vissuo un secolo prima e anche de più; che gaveva fato ati de eroismo, de amor patrio, de umanità, e anche de fede cristiana. Le storie che ne contava i nostri noni e che ciamavimo “favole” invesse le gera anche storia, de un mondo e dei omani del so tempo, che ne gaveva lassà qualcossa de bon, anche par el nostro.
In paese ghe gera un omo che se ciamava Arturo, un massarioto, pàre de fameja e un bon omo che godeva la fama de indovino parvìa del tempo. Un bravo agricoltore che, a richiesta, pronosticava l’avenire del tempo (in picolo), question de giorni o na setimana, e el più de le volte el ghe indovinava anche se pareva impossibile. Le so prevision el le faseva al momento, vardando el cielo, scontando l’aria, el vento, tegnendo conto de la luna, robe importanti par quei che viveva de la tera. La gente lo interpelava spesso par regolarse, par le semine e i racolti, el tempo gera importante.
El podestà, che andava ogni domenica a la messa granda co la mojere, el gera un patito de la siensa e le so invension, che lu propagandava come conquiste de la umanità, fati importanti e favolosi, quasi dei miracoli. El paroco conosseva l’omo e anche la so zente fassilitona a credare a tuto se lo diseva na autorità come el podestà. Qualche volta in cesa, ne la predica, el tocava l’argomento, savendo che el podestà gavarìa roversà i oci sbufando sotovosse. «Che la se rancura pure, la siensa, tuti i so meriti e le so scoperte – el diseva, come se l’argomento ghe vegnesse in boca par caso – ma fin che no i trovarà el rubineto de l’acqua, par far piovare quando la ghe vole, e fermarla prima de le inondassion, ghe xe del tempo ancora».
Arturo invesse, quando a la domenega, dopo el vespro, l’andava a l’ostaria de la Menata a far na partìa a tre sete, su l’argomento no verzèva boca. A qualcun che voleva savere come el faseva a pronosticare, el ghe rispondeva: «Se gavì bisogno, savì dove trovarme». Me xe tocà a mi, sensa volerlo, a assistare a una de le so prevision. Un dopodisnà de lujo de quel tempo, so andà a trovare i me compagni de scola e patronato, fioi de Arturo che gera drio a cargare del fen pronto par la teza su dei campi un poco distanti da la so boarìa. I tosi se dava da fare parchè portà casa el fen, se andava insieme al patronato par i nostri zoghi. A un serto punto xe rivà Arturo; el se ga cavà el capelo, el ga vardà in giro nel cielo come a sercare qualcossa, el ga dito ai fioi: «Tosi, no ste perdare tempo, parchè el vento tira dal mare e porta la piova; andè a casa de corsa col fen che fra poco piove». In cielo ghe gera solo qualche nuvoleta despersa. Dopo mezora o poco più, apena rivà col caro soto al portego de la stala, ga scominsià na piova che pareva el diluvio. Noialtri lo credevimo un prodigio, invesse la gera solo esperienza eredità dai so veci.
