Qualche ano fa, a causa de la television, qualche scola media me invitava a farghe visita par parlarghe ai studenti del passato, e rispondarghe a le so curiosità. E sicome i me vedeva a la television, subito i me domandava robe che riguardava quel mondo che, da fora, el pareva misterioso.
Questo xe un raconto natalissio che, oltre al solito Natale, toca un momento de la nostra Storia. Piero de la Monica – un reduce da l’Africa – nel secolo scorso, al tempo de l’Impero, el ne contava la storia del so Natale da militare, passà soto na tenda nel deserto.
